حضرت عیسیٰ علیہ السلام

HAZRAT Essa Ka Mojza In Urdu

حضرت عیسیٰ علیہ السلام ایک سفر میں نکلے تو آپ کے ہمراہ ایک یہودی ہو لیا۔ اس یہودی کے پاس دو روٹیاں تھیں اور حضرت عیسیٰ علیہ السلام کے پاس ایک روٹی تھی۔ حضرت عیسیٰ علیہ السلام نے اس سے کہا آؤ دونوں مل کر روٹی کھا لیں۔ یہودی نے مان لیا مگر جب اس نے دیکھا کہ حضرت عیسیٰ علیہ السلام کے پاس ایک روٹی ہے اور میرے پاس دو تو پچھتایا کہ میں نے شرکت کا وعدہ کیوں کر لیا؟ چنانچہ جب کھانے کا ٹائم ہوا تو یہودی نے ایک ہی روٹی رکھی۔ حضرت عیسیٰ علیہ السلام نے فرمایا تمہارے پاس دو روٹیاں تھیں۔ ایک کہاں گئی؟ یہودی بولا میرے پاس تو ایک ہی روٹی تھی۔ دو کب تھی؟ کھانا کھا کر آگے بڑھے تو ایک اندھا ملا حضرت عیسٰی علیہ السلام نے اس کے لئے دعا کی تو وہ اچھا ہو گیا۔ یہ معجزہ دکھا کر حضرت عیسیٰ علیہ السلام نے یہودی سے کہا تجھے اس اللہ کی قسم جس نے میری دعا سے اس اندھے کو اچھا کر دیا۔ بتا دوسری روٹی کہاں گئی؟ وہ بولا مجھے اسی خدا کی قسم! میرے پاس ایک ہی روٹی تھی دوسری تھی ہی نہیں۔

اتنے میں آگے بڑھے تو ایک ہرن دکھائی دیا۔

حضرت عیسیٰ علیہ السلام نے اسے بلایا وہ آ گیا۔

آپ نے اسے ذبح کیا۔ بھونا اور کھایا اور پھر اس کی ہڈیوں سے فرمایا قم بِاذن اللہ ! وہ ہرن پھر زندہ ہو گیا۔ حضرت عیسیٰ علیہ السلام نے فرمایا تجھے اسی خدا کی قسم! جس نے ہمیں یہ ہرن کھلایا اور پھر اسے زندہ کر دیا۔ بتاؤ وہ دوسری روٹی کہاں گئی؟ وہ بولا مجھے اسی خدا کی قسم! میرے پاس تو ایک ہی روٹی تھی۔آگے بڑھے تو ایک قصبہ آ گیا۔ حضرت عیسیٰ علیہ السلام نے وہاں قیام کیا۔ یہودی نے موقع پا کر حضرت عیسیٰ علیہ السلام کا عصا مبارک چرا لیا اور خوش ہوا کہ میں اس ڈنڈے سے مردے زندہ کیا کیا کروں گا چنانچہ اس نے قصبہ میں اعلان کر دیا کہ مردہ کو مجھ سے زندہ کرا لو۔ لوگ اسے حاکم شہر کے پاس لے گئے جو بیمار تھا۔ یہ گیا اور جاتے ہی پہلے وہ ڈنڈا اس حاکم کے سر پر دے مارا۔ وہ مر گیا اور پھر کہنے لگا دیکھو اب میں اسے زندہ کرتا ہوں چنانچہ پھر اسے ڈنڈا مارا اور کہا قم باذن اللہ ! مگر وہ زندہ نہ ہو سکا۔ اب تو یہ گھبرایا۔ لوگوں نے پکڑ لیا اور اسے پھانسی پر لٹکانے لگے کہ اتنے میں حضرت عیسیٰ علیہ السلام پہنچ گئے۔ فرمایا تمہارا حاکم میں زندہ کر دیتا ہوں۔ اسے چھوڑ دو چنانچہ آپ نے قم باذن اللہ کہا تو حاکم فوراً زندہ ہو گیا اور انہوں نے یہودی کو چھوڑ دیا۔ حضرت عیسیٰ علیہ السلام نے اس سے کہا تجھے اسی اللہ کی قسم! جس نے تمہاری جان بچائی بتاؤ وہ دوسری روٹی کہاں گئی؟ وہ بولا مجھے اسی خدا کی قسم! میرے پاس دوسری روٹی تھی ہی نہیں۔ آگے بڑھے تو سونے کی تین اینٹیں ملیں۔ عیسی علیہ السلام نے فرمایا ان میں ایک اینٹ میری دوسری تمہاری اور تیسری اس کی جس نے تیسری روٹی کھائی۔ وہ بولا خدا کی قسم! تیسری روٹی میں نے ہی کھائی تھی۔ آپ نے وہ تینوں اینٹیں

اسی کو دے دیں اور فرمایا: اب تم میرا ساتھ چھوڑ دو۔ چنانچہ وہ اینٹیں لے کر چلا گیا مگر

اللہ تعالی نے اسے اینٹوں سمیت پر دھنسا دیا۔